“Ən-Nəsr” məscidi Cəbəl Ömər məhəlləsində yerləşir və Şarcə əmirliyinin ən diqqətçəkən müasir memarlıq nümunələrindən biri hesab olunur.
Məscidin sahəsi 7 min 800 kvadratmetrdən çoxdur, lakin ilk baxışdan ən çox diqqət çəkən xüsusiyyət onun möhtəşəm günbəzidir. 20 metr diametrə və 16 metr hündürlüyə malik bu şüşə kürəvari günbəz məscidin tavanının təxminən 80 faizini örtür və tikilinin əsas memarlıq elementi sayılır. Günbəz “arı pətəyi”nə bənzər altıbucaqlı şüşə panellərdən ibarətdir; gündüz işığı əks etdirir, gün batanda isə valehedici və ruhani bir mənzərə yaradır.
Günbəzin yanında 38 metr hündürlüyündə minarə ucalır. Bu minarə ənənəvi düz xətlərdən fərqli olaraq, yumşaq bir burulma ilə yüksəlir və günbəzin əyriliyi ilə uyğunlaşaraq məscidə müasir bir görünüş bəxş edir.
Məscidin əsas ibadət zalında namaz qılanlar üçün 12 səf nəzərdə tutulub və məkan geniş, sakit və açıq bir atmosfer yaradır. Qiblə istiqamətində yerləşən böyük dairəvi şüşə fasad təbii işığın sərbəst daxil olmasına imkan verir və məkana mənəvi bir ab-hava qatır.
Məscidin daxili və funksional xüsusiyyətləri
Məscidin minbəri də öz fərqli dizaynı ilə seçilir. Ənənəvi, ağır naxışlı taxta minbərlərdən fərqli olaraq, bu minbər sadə və futuristik xətlərlə hazırlanıb və onun strukturunda yumşaq işıqlandırma istifadə olunub. Bu sadəlik günbəz və ibadət zalı ilə tam harmoniya yaradır.
Məscid ümumilikdə 1325 nəfər tutumuna malikdir. Əsas ibadət zalı 470 nəfər üçün nəzərdə tutulub, həyət və açıq sahələrlə birlikdə kişilər üçün ümumi tutum 1180 nəfərə çatır. Bundan əlavə, qadınlar üçün ayrıca 145 nəfərlik ibadət zalı mövcuddur.
Məscidin girişində sakit axan su ilə müşayiət olunan zərif bir fəvvarə qonaqları qarşılayır. Binanın ətrafında isə kiçik bağça, yaşıllıq sahələri və beton oturacaqlar yerləşdirilib ki, gün batımını izləmək daha xoş olsun.
“Ən-Nəsr” məscidi ibadət zalları ilə yanaşı, dəstəmazxana, sanitar qovşaqları, meyit yuma yeri, su paylayıcıları, imam üçün yaşayış yeri, ictimai kitabxana və dayanacaq kimi bölmələrə də malikdir və əz-Zid sakinlərinə və ətraf bölgələrə xidmət göstərir.
Məscidin gözoxşayan memarlığı və işıq oyunları onu xüsusilə gün batımı anlarında və Ramazan ayının mübarək gecələrində mənəvi toplantılar üçün ideal bir məkana çevirir. Burada iftarı sakitlik və gözəlliklə dolu bir atmosferdə keçirmək mümkündür.
